Kreu i Partisë Demokratike, Lulzim Basha, komentoi nga foltorja e Kuvendit planin e prezantuar nga kryeministri Edi Rama për përballimin e krizës së energjisë.
Basha ka paralajmëruar se ditën e nesërme do të depozitohet në SPAK një kallëzim për energjinë elektrike, sektor për të cilin kryeministri Rama paralajmëroi se do të goditet nga kriza.
“U bë një javë që tellalli i të keqes njohu shqiptarët me një krizë, që do të godiste vendin, me pasoja të rënda. Pasoja të ngjashme me ato të tërmetit dhe pandemisë, por pak kush e besoi. Në vijim të strategjisë së tij, nxori një plan për të zgjidhur këtë krizë, ku ajo që ra në sy ishte një borxh i ri. Pra, marrje e miliona eurove të tjera borxh, në emrin tuaj, nga xhepat tuaj dhe fëmijëve tuaj, për t’iu ngarkuar edhe më shumë. Jo pak, por 200 milionë euro borxh. Të dielën në drekë doli si lugat dhe tha krizë, që të shtrinte dorën edhe njëherë për ta zhytur Shqipërinë edhe më thellë në borxh. Kjo shifër e lartë nuk do të vijë te ju, as te familjet tuaja, por do të vihet në dispozicion të OSHEE, bandës më të madhe, me në krye kryebanditin Ardian Çela. Paratë që mungojnë i kanë vjedhur, i kanë futur në xhepat e tyre dhe i kanë përdorur për të blerë 400 euro votën, si psh. në Pukë.
Këto abuzime duhen të hetohen. Ne do të depozitomë nesër në SPAK kallëzim penal për t’ja vënë para fytyrës abuzimet me paratë e qytetarëve. Korrupsionin dhe papërgjegjshmërinë nuk duhet ta paguajnë qytetarët, por ata që abuzuan dhe abuzojnë me djersën e tyre Tendera luksi, kompani konsulence që mbushin xhepat në mënyrë korruptive, klientelizëm dhe punësime politike në administratat përkatëse të KESH dhe OSHEE, që përdoren politikën e tokës së djegur edhe për shkak të zgjedhjeve, ku paratë e dala nga këto institucione shërbyen për të kalcifikuar një pushtet të paligjshëm. Natyrisht të bëra bashkë me dritëshkurtësinë menaxhimin skandaloz të eksporteve, fitimet e të cilave avulluan edhe pse kambanat e rritjes së çmimeve kishin rënë prej marsit, por atë kohë merreshin me fushatë jo me planifikim. Duke shkurtuar në korrik dhe gusht rezervave ujore, në atë që ekspertët cilësojnë si viti më i mirë historik, hapën një pjesë të madhe të gropës që do të mbyllet duke marrë borxh. Të gjitha këto shpërdorime, duhet të hetohen me përparësi, ndaj edhe ne do të depozitojmë nesër kallëzimin penal në SPAK. Sepse korrupsionin dhe papërgjegjshmërinë nuk duhet ta paguajnë qytetarët, por ata që abuzuan dhe abuzojnë me djersën e tyre. Sigurisht kjo është vetëm një pjesë e krizës së korrupsionit që ka kapur vendin tone” tha ai.
