Një 15-vjeçare humbi jetën gjatë një ndërhyrjeje kirurgjikale në gju në një spital privat në Tiranë. Familjarët e Blerta Pepës tregojnë se vajza do kryente një ndërhyrje kirurgjikale për meniskun dhe ligamentin.
“Operacioni i planifikuar për t’u kryer në orën 10:00 të mëngjesit më 15 maj 2017, ishte bërë në orën 19:30 të darkës duke qenë se doktori i huaj që bëri ndërhyrjen duhej të ikte sot në Greqi”- tregon daja i vajzës.
Përmes një postimi në Facebook daja, Liro Likaj, thotë se Blerta ndërroi jetë mëngjesin e sotëm. Familjarët e 15 vjeçares fajsojnë spitalin për vdekjen e vajzës, pasi ata shprehen se iu ishte dhënë garanci.
“Spitali privat Continental më mori jetën e vajzës, mjekëve u çova kartelën e vajzës, ku ishte e qartë se ishte alergjike ndaj disa ilaçeve” ka deklaruar Bardhyl Pepa, babai i vajzës.
“Kur pashë se dicka nuk shkon, mjekët nuk po më tregonin dhe u futa në sallë”- thotë Pepa.
Në njoftimin e policisë që u shpërnda mëngjesin e sotëm thuhej se mjeku anastezist T. Zh., 53 vjeç, banues në Tiranë, ka tentuar të kryeje vetëvrasje duke injektuar në trup preparat lëndë anastezie. Ai ndodhet në spital, në gjendje të rëndë shëndetësore duke u mbajtur nën kujdes mjekësor.
Familjarët e mjekut anestezist dhe drejtori i spitalit kanë deklaruar se 53 vjeçari ka pësuar infarkt nga tronditja.
