Gjatë gjysmës së parë të vitit 2019, skadojnë afatet e kartave të identitetit për 1,4 milionë shqiptarë. Shqetësimi është i madh pasi ky skadim masiv përkon me vitin elektoral të zgjedhjeve vendore.
Ministri i Brendshëm Sandër Lleshaj, përmes një postimi në Facebook iu bën thirrje qytetarëve që të informohen për datën e saktë të skadimit dhe të mos neglizhojnë pajisjen me dokumentet bazë të identifikimit.
“Pajisja me kartat e identitetit dhe pasaportat e reja është një prioritet i rëndësishëm. Me to lidhet fati i shumë shërbimeve të rëndësishme. Zyrat e Gjendjes Civile janë në dispozicion për të informuar dhe ndihmuar qytetarët. Institucionet do të kushtëzojnë dhënien e shërbimeve, për personat që janë në muajt e fundit të vlefshmërisë së dokumenteve, me paraqitjen e vërtetimeve mbi aplikimin për dokumentin e ri”, shkruan Lleshaj në Facebook.
