1266 viktima, 14.939 raste aktive, dhe mbi 1.400 të tjerë në gjendje kritike për jetën. Ky është bilanci tragjik i shkaktuar nga koronavirusi në Itali.
Vetëm gjatë 24 orëve të fundit, në Itali, humbën jetën 250 persona nga koronavirus, shifër kjo e cila shënon numrin më të lartë të viktimave të regjistruara në vend gjatë këtyre tre javëve.
Në lidhje me këtë situatë tejet dramatike, ka folur edhe Maria Rita Gismondo, virologe dhe drejtoreshë e laboratorit kimik të mikrobiologjisë në spitalin Sacco në Milano.
Në një emision televiziv italian, Gismondo tha se koronavirusi i ri do të infektojë rreth 70% të popullsisë në Itali.
Mjekja infeksioniste tha në emisionin “Italia është zgjuar”: Të gjithë e dimë se ky virus po përhapet me shpejtësi në popullsi, shumë më tepër nga se mund të imagjinonim. 60-70% e popullsisë italiane do të rezultojë pozitive me koronavirus. Por ne nuk kemi pse të shqetësohemi. Ndërsa shifrat rriten, ne do të kuptojmë se ky virus është më pak vdekjeprurës sesa mund ta mendojmë tani. Ky virus, në shumicën e rasteve, është ose i heshtur ose na jep simptoma të ngjashme me gripin në 90% të rasteve. Vetëm 10% e personave të prekur duhet të shtrohen në spital. Mbrojtja Civile na ka thënë disa herë se personat më të prekur janë të moshuarit me 1 ose 4 patologji.
Mjekja tha se ngrohja e temperaturave mund të sjellë dobësimin e koronavirusit.
“Është e vërtetë që kur temperaturat rriten, viruset si korona dobësohen, por kjo ndodh kryesisht për shkak të zakoneve tona, sepse gjatë dimrit grumbullohemi në ambiente dhe zakonisht qëndrojmë shumë më pranë njëri-tjetrit. Gjatë verës qëndrojmë më shumë jashtë dhe kjo na ndihmon të jemi më pak të ekspozuar ndaj viruseve”, u shpreh Mjekja.
