Sot në Ditën Ndërkombëtare të Punëtorëve, në Kosovë u shënuan protesta të organizuara nga sindikatat që merren me mbrojtjen e të drejtave të punëtorëve.
Kryetari i Bashkimi i Sindikatave të Pavarura të Kosovës, Avni Ajdini tha se punëtorët duhet të raportojnë për shkeljet që ju bëhen. Ai u shpreh se paga minimale duhet të jetë 220, edhe pse sipas tij, kjo gjë është vetëm në letër.
“Gjithmonë duhet të jemi unik që të realizojmë të gjitha kërkesat. Kemi çdo ditë shkelje ligjore dhe kërkojmë që ligji të zbatohet. Kërkojmë nga punëtorët të deklarohen për shkeljet që iu bëhen në vendin e punës”, tha Ajdini.
Shqetësuese sipas organizatave që merren me të drejtat e punëtorëve është hezitimi i punëtorëve në sektorin privat për të denoncuar shkeljet e të drejtave të tyre, për shkak të frikës së humbjes së vendit të punës. Lidhur me këtë, KDI i ka rekomanduar Inspektoratit të Punës që të shtojë inspektimet dhe të rrisë numrin e inspektorëve.
