Pas 670 ndeshjes dhe 31 trofeve të fituar, Andres Iniesta ka konfirmuar largimin e tij nga Barcelona në fund të këtij sezoni, duke i dhënë fund një karriere 22 vjeçare te klubi katalunas.
Gjatë një konference për shtyp, Iniesta e bëri të ditur vendimin e tij për t’u larguar nga La Liga, dhe pritet që t’i bashkohet klubit kinez, Chingqing Dangdai.
“Nuk e imagjinoja kurrë se do të arrija ato që kam arritur këtu. Është një klub i mrekullueshëm. Nuk ka qenë një vendim i lehtë për t’u marrë. Kam folur me shumë njerëz para se të bindesha”, ka thënë mesfushori spanjoll.
Kapiteni i Barcelona-s është pyetur edhe në lidhje me faljet që i ka kërkuar “France Football” për faktin se nuk e ka vlerësuar atë me “Topin e Artë”: “Nuk është një problem për mua dhe nuk do të jetë një peng. Kam fituar shumë në karrierën time”. Në lidhje me aventurën e ardhshme: “Nuk doja të qëndroja në Europë, sepse nuk doja të luaja kundër Barçës”.
Konferenca është ndërprerë në një moment për shkak se gazetarët e pranishëm i kanë dedikuar një duartrokitje të përbashkët, gjë që e ka befasuar dhe emocionuar akoma më shumë Iniesta-n, i cili ka vazhduar më pas me falënderimet.
