Nënkryetari i Bashkisë së Tiranës, Arbjan Mazniku, tha se objektivi kryesor i këtij plani 5-vjeçar është që deri në vitin 2021 të ketë ujë të pareshtur për 24 orë në të gjithë Tiranën.
I ftuar në rubrikën “Opinion” në studion e lajmeve të News24, Mazniku shpjegon se ky plan ka si objektiv edhe përmirësimin e cilësisë së ujit, që të jetë i pastër dhe i pijshëm.
“Objektivi kryesor i këtij plani është që deri në vitin 2021 të kemi ujë pareshtur për 24 orë në të gjithë qytetin e Tiranës. Rreth 60% e qytetit furnizohet nga burimi i Bovillës. Uji i Bovillës, nga të gjitha parametrat, është jo vetëm i pijshëm por edhe nuk ka arsye të mos jetë i këndshëm. Por në çezmat e njerëzve, uji kalon nga depozita, e cila nuk e mban shumë të pastër ujin. Ky është qëllimi që njerëzit të mos kenë më depozita, por sa herë të hapin çezmën uji t’i vijë direkt, dhe të jetë i pastër dhe i pijshëm,” tha Mazniku.
Nënkryetari i Bashkisë së Tiranës gjithashtu shprehu shqetësimin për ndërrimin e tubacioneve, pasi për shkak se janë të shpuar, një sasi e madhe shkon dëm.
“Pjesa më problematike është riparimi i tubave të transmetimit, ku shpesh janë të çara, kanë nevojë për riparime, bypass-e. Kemi përmirësuar linjat e shpërndarjeve nëpër lagje. Zona e Yzberishtit që sot kur flasim ka rreth 50 mijë banorë, do të ketë një linjë të veçantë. Duhen ndërruar tubacionet, që ato të mos rrjedhin ujë. Me tubat e rinj, do të jetë e pamundur që ata të shpohen”, – u shpreh Mazniku.
