Këshilli i Lartë i Prokurorisë ka shkarkuar nga detyra prokuroren e Dibrës, Belina Zeneli, pas kërkesës së Inspektorit të Lartë të Drejtësisë se prokuroja në fjalë ka zvarritur dhjetëra çështje. Zeneli është emër i njohur për opinion publik, pasi identifikohet midis të tjerash edhe si prokurorja e dosjes 184, për hetimin e blerjes së zgjedhjeve për Bashkinë e Dibrës, të zhvilluara në vitin 2016.
Më 20 janar, Inspektori i Lartë i Drejtësisë Artur Metani kërkoi shkarkimin e Zenelit, duke e akuzuar se ka zvarritur 10 çështje gjyqësore dhe ka cenuar besimin te drejtësia. Sipas ILD, Zeneli ka zvarritur hetimet paraprake duke mos i kryer veprimet hetimore në kohë dhe në dinamikë për periudha të gjata kohore të gjata, tej afateve procedurale dhe pa pasur arsye ligjore.
ILD argumentoi në kërkesën e saj se nga veprimet e prokurores Belina Zeneli, nuk i ka dhënë zgjidhje ligjore 33 procedimeve penale, si dhe nuk ka kryer asnjë veprim verifikimi në lidhje me 300 kallëzime.
Veprimet e magjistrates kanë sjellë pasoja në dhënien e drejtësisë dhe kanë cënuar imazhin e organit të akuzës duke ulur besimin e publikut tek drejtësia. Ato përbëjnë shkelje shumë të rëndë disiplinore, që diskrediton pozitën dhe figurën e prokurorit gjatë ushtrimit të detyrës.
