Andi Lila, kreu i Sindikatës së Futbollistëve Profesionistë dhe ish futbollist i Kombëtares ka reaguar pas deklaratës së kreut të KOKSH, Fidel Ylli, në lidhje me fushatën zgjedhore në FSHF, ku akuzoi Armand Dukën për korrupsion.
Lila shkruan në Facebook se Fidel Ylli, kreu i KOKSH (Komiteti Olimpik Shqiptar) po mban anën e Erion Veliajt jo vetëm në përplasjen ideore, por edhe me kërcënime, duke futur KOKSH në lojën politike.
“Me këtë reagim, z.Fidel Ylli nga zyra e KOKSH, me flamurin e olimpizmit ngriti atë të PS veprim të cilin unë e kam denoncuar që përpara se të zgjidhej në krye të KOKSH. Z.Fidel nuk duhet të flasë sipas orientimeve që merr nga zyra e bashkisë Tiranë nga ku përcjell skuadrën olimpike por duhet të flasë si përfaqësues i komunitetit sportiv në Shqipëri. Z. Kryetar i KOKSH, për në komunitetin sportiv ka më tepër rëndësi sporti shqiptar, në situatën ku Shqipëria e Futbollit kërcënohet me përjashtim nga FIFA dhe UEFA. Ju duhet të jeni me Shqipërinë e futbollit”.
Ndër të tjera, Lila i kujton Yllit rastin kur ndërhyri si ndërmjetës mes qeverisë dhe futbollit, duke i kërkuar të mos nxisë konflikte por të luajë sërish rolin e ndërmjetësuesit.
“Mos harroni se para një viti edhe pse pa post, ju u bëtë ndërmjetës mes futbollit dhe qeverisë, ju lutem mos i hidhni benzinë zjarrit në këtë situatë. Vazhdoni procesin e ndërmjetësimit. Shqipëria e futbollit është shumë më e madhe se interesat personale të gjithë secilit nga ne”, shton ai.
Edhe ditën e djeshme, Lila reagoi për ndërhyrjen e politikës në zgjedhjet e FSHF, ku i bëri thirrje të gjithë aktorëve politikë që të tërhiqen nga veprimet e papërgjegjshme për të ndërhyrë në çështje që i takojnë komunitetit të futbollit.
