Një 32 -vjeçar nga Tirana dhe një 47 -vjeçar, banues në Himarë po procedohen penalisht për shkak se kanë zaptuar hapësirën publike në shkelje të ligjit. Policia e Himarës ka zhvilluar kontrolle në vijën bregdetare, me qëllim lirimin e hapësirave publike, për pushues, nga ku janë kapur në shkelje dy personat e sipërpërmendur.
Shërbimet e Policisë Himarë, në bashkëpunim me Policinë Bashkiake Himarë, kanë liruar hapësirën publike, duke hequr 120 çadrat dhe shezlongët që ishin vendosur pa lejen përkatëse, në vendin e quajtur “Porto Palermo”. Materialet në ngarkim të këtyre shtetasve u referuan në Prokurorinë pranë Gjykatës së Shkallës së Parë Vlorë, për veprime të mëtejshme.
Policia ka filluar prej disa ditësh aksionin në të gjithë bregdetin shqiptar, nga ku çdo ditë ka kapur në shkelje persona të cilët vendosnin në plazhe çadra dhe shezlongë pa lejen e posaçme.
