Deputetja e Partisë Demokratike, Ina Zhupa tha se qeveria duhet ta shohë me “syzet” e realitetit protestën e mijëra qytetarëve, të cilët po mblidhen çdo ditë në shesh duke kërkuar largimin e kryeministrit Edi Rama nga qeveria.
Ajo iu drejtua deputetëve socialistë duke iu thënë se nëse mendojnë se mandatet e tyre i kanë marrë me votat e qytetarëve dhe jo nga paratë e krimit, duhet t’i përgjigjen kërkesave të tyre që janë artikuluar në shesh.
“Përgjigjuni realitetit. Realiteti kërkon dorëheqjen e Edi Ramës, kërkon një qeveri tranzitore, një parlament që miraton shfuqizimin e ligjeve kundër interesit publik, një parlament që nuk i anatemon protestuesit, nuk i numëron me syzet e miopit, por me syzet e realitetit.
Qindra mijëra në shesh që kërkojnë dorëheqjen e Edi Ramës dhe shfuqizimin e atyre ligjeve që e kanë trajtuar Shqipërinë si një plaçkë. Nëse besoni se mandatet tuaja vijnë nga votat e qytetarëve, përgjigjuni atyre. Nëse besoni se mandatet tuaja vijnë nga vullneti i Edi Ramës dhe paratë e oligarkëve dhe kriminelëve, mos iu përgjigjeni, por do t’u përgjigjen qytetarëve juve.
Do ta merrni përgjigjen siç po e merrni, siç po e shikoni çdo ditë më të vendosur, ë të qartë në objektivat e tyre, për të kërkuar se kjo qeveri, kjo sjellje harbute duke shkelur kushtetutën dhe interesin publik të ndalojë.”, u shpreh deputetja.
Kryetari i grupit parlamentar të PS, Taulant Balla ka ironizuar opozitën duke i konsideruar si “flamingo nga Temu”. Në fjalën e tij në Parlament, Balla deklaroi se projekti në zonën e Zvërnecit do të realizohet, duke theksuar se Shqipëria nuk ka luksin që të humbë 4 mld euro në këtë zonë.
“Ky ishte fiks një fjalim i një flamingo nga Temu, më pëlqeu shumë që ju zogjtë e bufit ju duket vetja si flamingo edhe pse me respektin më të madh kush ju ka komanduar ju? Bëni zhurmë sa të doni, shkoni edhe në protestë po deshët, vidheni edhe atë, por ne jemi kundër 4 pr ligjeve që keni sjellë.
Do t’i rrëzojmë sepse jemi votuar për ta zhvilluar Shqipërinë. Një javë më parë dolët me kryedrejtuesin tuaj bufin e madhe dhe thatë që jeni pro investimit, tani kush është qëllimi i 4 pr ligjeve? Jeni pro apo kundër investimit. Ne jemi pro dhe investimi do të bëhet. Shqipëria nuk e ka luksin të humbë 4 mld. Pse bëheni qesharakë? Zonja që sapo foli sapo citoi edhe tekstin e zëdhënësit e Ministrisë së Jashtme të Iranit, që tha Rama ik!
Po ju ç’kërkoni në protestë? Pashë edhe një deputete të PD që ishte në protestë e tha jemi këtu kundër sistemit. Kundër kujt sistemi. Në një protestë ku thirret Berisha në burg… Ne nuk kompleksohemi sepse e dimë fare mirë që kemi një kontratat me qytetarët”, tha Balla.
