Një nga banorët e pallatit në Astir ku ra zjarr ka treguar se si shpëtuan familjarët nga godina që mori flakë. Në një prononcim për mediat, banori tregon se shumë banorë kanë thyer xhamat dhe kanë nxjerrë gratë e fëmijët nga dritaret përmes shkallëve lëvizëse. Ai thotë se kanë dëgjuar edhe shpërthime, por pritet që të zbardhen më shumë detaje pas hetimeve.
“Ishim në gjumë kur ra zjarri. Ra poshtë. Morëm ato shkallët që hapen dhe thyen xhamat njerëzit e nxorën gratë e fëmijët. Gjithë çfarë kishin i nxorën. Reaguan shumë shpejt ata të zjarrfikëses, erdhën shpejt. Se çfarë ndodhi me zjarrin nuk dimë gjë. S’dimë nëse ka pasur ndonjë shkëndijë apo jo. Dëgjuam shpërthime poshtë në garazh,”- tha banori.
Zjarri u aktivizua pas mesnatës së kaluar, rreth orës 01:00. Në total u dogjën katër mjete dhe u plagosën tetë persona. Të lënduarit kanë marrë ndihmën e nevojshme mjekësore në spital dhe janë larguar për në banesat e tyre.
