Sulejman Dushku është një prej zjarrfikësve më të vjetër në Korçë. Prej 32 vitesh ai përballet me zjarrin dhe thotë se do të vazhdojë ta bëjë derisa të ketë forcë.
Zjarrfikësi, i cili nisi punën që në vitin 1985 në qytetin e Korçës ruan në kujtesë shume ngjarje.
“Kemi patur shumë situata, kemi rrezikuar jetën tonë, kemi dhënë ndihmën dhe kemi shpëtuar edhe jetë. Një rast ka qenë rasti i rënies së zjarrit në një pallat këtu në Korçë dhe ne ishim në majë të çatisë”, kujton Sulejmani.
Por edhe sot, puna për Sulejmanin dhe kolegët nuk është e lehtë. Vetëm 5 automjete zjarrfikëse ndodhen në stacionin e Korçës. Ato përdoren për të fikur zjarret në Bashkinë e Korçës, Maliqit dhe Pustecit.
Mungesa e stacionit zjarrfikës përbën shqetësim edhe për Maliqin, i cili nuk i ka shpëtuar valës së zjarreve të fundit, me 6 banesa te djegura dhe rrezikimin e jetës se banorëve.
“Kur flasim për një bashki si Bashkia e Maliqit me rreth 70 mijë banorë dhe sipërfaqje shumë të madhe si hapësirë, mendoj se Drejtoria e Përgjithshme e Mbrojtjes Kundër Zjarrit duhet ta kish parë me përparësi”, shprehet Gëzim Topçiu, kryetar i Bashkisë së Maliqit.
Në këto kushte, zjarrfikësit thonë se udhëhiqen më shumë se nga ndjenja e detyrës, por nga humanizmi në përmbushjen e misionit të tyre.
/tch/
