Reali i Madridit do të luajë sot në mbrëmje ndaj Sevijës, por Zinedin Zidan “injoron” kampionatin sepse e ka mendjen te finalja e Ligës së Kampioneve. Në konferencën për shtyp përpara mediave, ai tregon “El Clasico”-n dhe atë që ndodhi jashtë saj, ndërsa thumbon katalanasit se të gjithë e panë çfarë ndodhi, por askush nuk dënon asnjë. Zizu kërkon që ta zbehë duelin mes Ronaldos dhe Salahut, duke thënë se ky i fundit nuk është në nivelin e tij dhe ndoshta s’është për “Topin e Artë”.
NDESHJA– “Tani jemi të qetë sepse e dimë që na mungojnë vetëm 3 ndeshje në kampionat dhe nesër (sot) do të kërkojmë të bëjmë një ndeshje të mirë. Objektivi është ta përfundojmë kampionatin sa më lart. Është një mundësi për të marrë 3 pikët. Por e dimë që kundërshtarët tanë luajnë një ndeshje të rëndësishme”.
MESI– “Nuk më surprizon sjellja e Mesit në ‘El Clasico’, por nuk do të flas për këtë. Ajo duhet të përfundojë në fushën e lojës”.
JASHTË FUSHËS– “Gjithmonë ndodhin shumë gjëra jashtë fushës së lojës. Problemi është se tani u mor vesh gjithçka. Ju e dini të gjithën. Shumë kamera dhe shumë komente brenda në tunel të lojtarëve. Edhe më përpara ndodhnin shumë gjëra, por ato mbeteshin në fushë dhe nuk merreshin vesh”.
KAMERAT– “Më përpara kishte më pak kamera, por nuk jam këtu për të komentuar atë që ndodhi në ndeshjen e kaluar. Njerëzit e morën vesh se çfarë ndodhi dhe duhet të vendosin. Por, kjo nuk ndryshon asgjë. Në fund ka gjithmonë vetëm fjalë dhe asgjë nuk ndryshon”.
LIVERPULI– “Ka pak nga të gjitha. Është në finale dhe e dimë që do të bëjnë një ndeshje të mirë: Fizikë, teknikë, të shpejtë. Është një skuadër angleze dhe do të luftojë dhe do të mbrohet. Por mbetet shumë kohë deri atëherë. Salah? Është një lojtar i madh, por nuk është i imi”.
NEJMAR– “Nuk është lojtari im. Nuk do të merrem me këtë punë. Më intereson të flas vetëm për lojtarët që kam në skuadër”.
POLEMIKAT- “Nuk e di se i kujt është faji që flitet shumë për këtë çështje. Është e atyre që komentojnë. Më e mira është që të flitet vetëm për ndeshjen”.
FINALJA- “Do të jetë një ndeshje spektakolare, e hapur dhe me shumë raste. E rëndësishme është që ne të planifikojmë mirë ndeshjen. Do ta analizojmë me detaje kundërshtarin sepse është një finale dhe do të ketë shumë intensitet”.
RONALDO– “Do të luajë në finale. Është i jashtëzakonshëm në fushën e lojës. Ai tregon ambicie gjithmonë dhe tregon dëshirën për të luajtur”.
SALAH– “Nuk e di nëse është për ‘Top të Artë’, por ka bërë një sezon shumë të mirë. Nuk do të jetë finalja një duel mes Ronaldos dhe Salahut, por një Real-Liverpul”.
