Deputetja e Partisë Demokratike, Ina Zhupa ka denoncuar ditën e sotme vendimin për shembjen e shkollës “Emin Duraku” tre vite pas dëmtimeve të shkaktuara nga tërmeti.
Zhupa u shpreh se shkolla është nxjerrë jashtë funksionit dhe ka një plan për rindërtimin e saj nga fillimi. Ajo shtoi se në këtë rast kemi të bëjmë me abuzim të pastër që të nxjerr në dy përfundime, ose shkolla duhej shkatërruar që në fillim ose dëmet nuk janë serioze dhe po shembet për të marrë fondet e rindërtimit.
Deklarata e Ina Zhupës:
Partia Demokratike ka disa ditë, por në fakt ka vite që denoncon gjendjen e mjerueshme të arsimit në Shqipëri. Ne ndodhemi këtu, dhe mbrapa meje është shkolla “Emin Duraku”, shkolla 9-vjeçare e kryeqytetit e njësisë Nr.5, e cila aktualisht është jashtë funksionit.
Por, si është historia e kësaj shkolle? Kjo shkollë me tërmetin e vitit 2019-të pati dëmtime të lehta sipas Institutit të Ndërtimit. I cili e certifikoi shkollën si të mundeshe për të kryer procesin mësimor. Jo vetëm kaq, por nxënësit dhe mësuesit kanë bërë mësim për 3 vite në këtë shkollë në kushtet që ishin të certifikuara si një shkollë e parrezikshme, pavarësisht dëmeve që kishte pësuar nga tërmeti.
Me insistimin e prindërve ka pasur edhe disa rikonstruksione të vogla në këtë shkollë. 3 vjet më vonë qeveria, bashkia, Ministria e Arsimit kujtohen që shkolla qenka një shkollë për t’u shkatërruar dhe qenka e rrezikshme për nxënësit dhe mësuesit.
Shkollën tani e kanë nxjerrë jashtë funksionit, dhe duan ta shkatërrojnë dhe ta rindërtojnë nga fillimi. Në këtë rast kemi të bëjmë me abuzim të pastër. Dy janë mundësit: Ose shkolla ka qenë që atëherë për tu shkatërruar, dhe nuk e kanë shkatërruar e kanë futur nxënësit dhe mësuesit duke u rrezikuar jetën për 3 vjet këtu. Në këtë rast duhet të shkojnë për ndjekje penale ata që kanë rrezikuar jetën e mësuesve dhe të nxënësve të Tiranës.
Dhe në rastin e dytë kur shkolla nuk ka pasur dëme serioze dhe raporti i institucionit të ndërtimit ka qenë real, dhe sot po e prishin kotë. Po e prishin për të marrë ato fonde e rindërtimit, për t’ia dhënë oligarkut të radhës, apo siç thonë banorët se duan t’i zvogëlojnë sipërfaqen për shkak të një pallati tjetër që do të ndërtohet në krah të shkollës.
Edhe në këtë rast është shpërdorim detyre dhe për burg. Të dyja rastet i çojnë zyrtarët e ministrisë, zyrtarët e institutit të ndërtimit, zyrtarët e Bashkisë Tiranë në burg. Por, në fund ata që vuajnë dhe ata që e pësojnë këtë gjendje të shpërdorimit të detyrës, të trajtimit të pronës publike si pronë private ata janë pikërisht nxënësit, mësuesit dhe banorët e kësaj zone.
