Policia e Shtetit raportoi përpara katër ditësh zhdukjen e një 45-vjeçari, i cili u dyshua se ishte mbytur në liqenin e Farkës.
Ishin familjarët e tij të cilët denoncuan filllimisht zhdukjen dhe në varësi të deklaratave të tyre dyshohej se ai mund të ishte mbytur.
Edhe pse kanë kaluar 4 ditë nga kjo ngjarje e rëndë ende nuk ka asnjë të dhënë nga kërkimet e bëra prej pulmbarëve. Në një intervistë për Faxnews vëllai i personit të zhdukur, apelon që shteti të shtojë kapacitete kërkuese pasi sipas tij është një skandal i madh që mos të gjendet trupi i 45-vjeçarit që ka katër ditë në ujërat e liqenit.
“Kapaciteti është shumë i pakët, po bëhet një kërkim në mënyrë private. I bëj thirrje ministrit, kush e ka kapacitetin, të na bjeri forcat se me këto është e vështirë. As sot nuk do gjendet. 2 grupe vijnë, këto që vijnë Zoti ua shpërbleftë. Nëna dhe babai nuk e dinë se ne nuk e dimë kur do dali. Nuk do i tregoj prindërve, nuk dua ti coj prindërit në varr para vëllait. Fëmijët e dinë se ai është në Greqi”.
I pyetur nëse ka shpresa për mbijetesë ai u përgjigj:
“Çdo gjë mund të ndodhë, unë e quaj vëllain të mbyt përderisa janë shenjat. Nuk mund të bëjmë fantazime nëse ai ka bërë lojë, faktet tregojnë që ai është mbytur. Problemi është te kërkim shpëtimi. Unë du që të vij i gjithë kapaciteti, pasi është një terren i vështirë dhe sipërfaqja e liqenit është 70 hektarë. Plus që ne nuk kemi një koordinatë, pasi nëse do të kishim një koordinatë atëherë ai do të gjendej.
Vëllai ka pas ardhur këtu edhe me djalin e vet dhe ishte notues. Janë gjëra që janë në dorë të të madhit zot dhe kjo ka ndodhur tashmë dhe unë nuk jam këtu përse ka ndodhur.
Jam këtu për t’i bërë thirrje organeve më të larta të shtetit, sikur edhe në kryeministri, vëllai im ka 4 ditë që është i humbur dhe është në ujëra. Mund ta quaj një skandal të madh që ka katër ditë në ujra dhe nuk mund të gjendet trupi.
Për mu du që çdo lloj kapaciteti që ka shteti të vijë dhe të gjejë trupin e vëllait tim për të bërë funeralin”, tha vëllai.
