Presidenti i Komisionit Evropian, Jean Claude Juncker, mbajti sot një fjalim para deputetëve të Parlamentit Evropian ku u ndal te zgjerimi i BE, duke thënë se “nëse duam paqe në fqinjësi, duhet të mbajmë perspektivë të besueshme të zgjerimit për vendet e Ballkanit Perëndimor”.
Juncker tha se nuk do të ketë asgjë deri në fund të mandatit të tij, sepse asnjë nga vendet kandidatë nuk do të jetë i gatshëm për anëtarësim.
“Në vitet pas këtij mandati, Bashkimi Evropian do të ketë më shumë se 27 anëtarë, sa ka tani”, tha Juncker.
Juncker bëri ftesë për më shumë solidaritet rreth migrimit dhe ftoi që të gjithë ata, të cilët nuk i përmbushin kushtet për strehim në BE të kthehen në vendet e tyre. U bëri ftesë shteteve anëtare që më shpejt të shkëmbejnë të dhënat për luftëtarët e huaj dhe të dyshuarit për terrorizëm.
Për të pasur më shumë efikasitet në politikën e përbashkët të jashtëm BE-ja duhet të ketë edhe disa fusha ku vendimet në Këshill do të miratohen me shumicë të kualifikuar e jo vetëm me konsensus.
