Procesi i zgjedhjeve të kryetarëve të degëve në Partinë Demokratike vijon të kontestohet nga ata që konsiderohen si mbështetës të grupimit të Lulzim Bashës.
Kryetari në detyrë i degës numër 8 në Tiranë, Pëllumb Seferi, përmes një deklarate shprehet se zgjedhjet që po zhvillohen thellojnë edhe më tej përçarjen mes demokratëve, ndërsa e konsideron të paligjshëm procesin.
“PD dega 8 e kundërshton këtë proces votimi që po zhvillohet ditën e sotme në degën tonë, është i paligjshëm, i njëanshëm që e bën ndarjen e PD edhe më të rëndë, ndaj kryesia e PD-së, dega 8 është mbledhur dhe miratoi një deklaratë që kundërshton këtë proces, duke e konsideruar si një veprim jo i rrezikshëm por e çon Partinë Demokratike në përçarje të thellë.”
Nga ana tjetër, Pëllumb Seferi shprehet se dega 8 nuk është dakord dhe sipas tij këto zgjedhje bëhen për interesat e zgjedhjeve.
“Dega 8 e ka bërë të qartë që nuk është dakord, nuk ka qenë në krye të herës. Këto zgjedhje bëhen për interesat e disa njerëzve që e duan PD-në për atë që iu intereson. Nuk është normale, ka sekretar, ka kryesi që duhet të bisedosh para se të zhvillosh një takim, është e qartë fare, ne nuk pajtohemi dot me paligjshmërinë, po të mos kisha mbështetjen e anëtarësisë nuk mund të shprehesha kështu.”
Së fundmi, ai është shprehur se është i gatshëm për të biseduar me këdo.
“Zyra është hapur për të biseduar me këdo, të marrin në telefon dhe thonë hajde flasim te kafja se do të japim një postë. U kanë bërë presione, ka paligjshmëri. Që në nisje je në shkelje. Kanë marrë në mënyrë klandestine listat e anëtarësisë. Përdorin lista të marra në mënyrë ilegale.”
Reagimi vjen në një kohë kur në degën 8 anëtarësia po voton lidhur me kryetarin e ri të degës, ndërsa deri më tani janë zgjedhur të paktën 28 kryetarë degësh të PD-së.
