Pak më para është mbyllur zyrtarisht procesi i votimit në bashkitë e vendit. Qytetarët e Durrësit, Vorës, Dibrës, Rrogozhinës, Lushnjës dhe Shkodrës iu drejtuan sot kutive të votimit për të zgjedhur kryetarët e rinj të bashkive.
Menjëherë pas mbylljes së procesit, ka reaguar dhe Indrit Sefa, përfaqësuesi i Partisë Demokratike për qytetin e Lushnjës.
Me anë të një postimi në llogarinë e tij në “Facebook”, Sefa falënderon të gjithë qytetarët që morën pjesë në zgjedhje.
“Kushtet atmosferike nuk ishin në favor të pjesëmarrjes së lartë në zgjedhje, por shumë lushnjarë e ushtruan të drejtën e tyre kushtetuese. Falënderoj me zemër këdo që mori pjesë në zgjedhje, pavarësisht preferencës së tyre politike.
Jam i sigurte se përmbajtja dhe qytetaria do të na shoqërojnë deri më numërimin e votës së fundit! Vullneti i lushnjarëve do të lexohet siç është në kutitë e votimit”, shprehet Sefa.
Po ashtu ai është shprehur optimist se vota e qytetarëve lushnjar ka shkuar për ndryshimin dhe se çdo votë do të numërohet.
Kujtojmë që pjesëmarrja në votime nuk ishte shumë e lartë.
Sipas KQZ, rezulton se në total kanë votuar vetëm 30.33% e 654,538 qytetarëve shqiptarë që kishin të drejtë vote.
Në vend të parë renditet Dibra me 43.35% e qytetarëve. Në vend të dytë vjen Vora 38.47%, e treta Lushnja me 35.96% dhe e katërta Rrogozhina me 30.92%. Dy vendet e fundit i zënë Shkodra e Durrësi me përkatësisht 29.11% dhe 26.4% të votuesve.
