Procesi do të mbahet në komunat me shumicë serbe
Zgjedhjet e parakohshme të Serbisë do të mbahen edhe në Kosovë. Këtë e ka deklaruar për mediat kosovare Slavko Simiq, shef i grupit parlamentar të Listës Serbe. Votime do të ketë në komunat me shumicë serbe në vend. Serbët e Kosovës tashmë kanë nisur mobilizimin e tyre për të kontribuar në zgjedhjen e re të klasës politike në Serbi më 24 prill të këtij viti. Thirrje serbëve të Kosovës u është bërë edhe nga ministrat e Republikës së Kosovës. Slavko Simiq, shef i grupit parlamentar të Listës Serbe, ka deklaruar për “Zërin” se zgjedhjet e Serbisë do të mbahen edhe këtë vit në Kosovë, ashtu siç janë mbajtur më 2012 dhe 2014. Ai nuk ka dashur t’i komentojë deklaratat e ministres Edita Tahiri, e cila ka thënë se zgjedhjet serbe nuk do të mbahen në Kosovë, duke thënë se Tahiri nuk vendos për mbajtjen e zgjedhjeve, por për këtë çështje vendos kryeministri dhe Qeveria./Zëri
