Alfred Moisiu, ish President i Shqipërisë, mbështet nismën e një grupi deputetësh për zgjedhjen e Presidentit të Republikës nga populli. Në bazë të qëndrimit të tij është shmangia e pazarit politik që bëhet me figurën e presidentit në Shqipëri.
Moisiu nuk ka nguruar të përgëzojë 30 deputetet që kanë ndërrmarë këtë nismë.
Sipas tij nëse kjo do të realizohej do të ishte një arritje shumë e madhe për vendin tonë.
Alfred Moisiu: “Unë presonalisht kam qenë me kohë për ta zgjedhur Presidentin nga populli. Dhe dini pse? Për arsye se mënyra sesi zgjidhet Presidenti është kthyer në një pazar politik. Ne avash avash po shkojmë tek ajo që nuk zgjedhim një kryetar shteti, por po zgjedhim një nënpunës në Presidencë. Kryetari i Shtetit është kryetari i Shtetit dhe kushtetuta e përcakton se çfarë detyrimesh ka dhe si duhet të jetë. Pikërisht për të shmangur këtë pazarllëk, që për fat të keq ka ardhur duke u thelluar unë kam qenë dhe tani më vjen mirë që një grup deputetësh e kanë paraqitur si amendament për të bërë një ndryshim kushtetues dhe kjo do të ishte një arritje shumë e mirë.
Gjithashtu, ish president i Shqipërisë, Alfred Moisiu theksoi se Kodi Zgjedhor duhet rishikuar dhe t’i përshtatet kushteve të reja të zhvillimit të vendit tonë.
“Reforma në drejtësi është një ndryshim i madh që po bëhet, por ama edhe zgjedhja e Presidentit është një ndryshim i madh që duhet ta bëjmë. Duhet ta bëjmë sepse po ta shprehim në gjuhë popullore, Presidenti duhet të jetë në rolin e plakut të shtëpisë. Në shqiptarët e dimë se çfarë është plaku i shtëpisë dhe e kuptojmë rëndësinë dhe vlerat e tij. Prandaj vulën për të zgjdhur një figurë të tillë duhet ta japë populli sepse populli nuk të zgjedh nëse ke probleme që nuk i shkojnë përshtat një figure që duhet të jetë kryetari i shtetit. Kodi Zgjedhor të rishikohet dhe të përshtat kushteve të reja, zhvillimit të vendit tonë dhe politikës në tërësi” – tha Moisiu
