Partia Socialiste ka mbledhur seancën e të enjtes firmat e deputetëve për Kryeprokurorin. Të paktën katër ligjvënës socialistë thanë për Report Tv se iu është paraqitur një fletë e bardhë gjatë seancës së Kuvendit, ku nuk shkruhej asgjë dhe iu është kërkuar të hedhin firmën për të propozuar një kandidat për pasardhësin e Adriatik Llallës. Ata shtojnë se nuk e dinë për kë nga kandidatët në garë kanë firmosur. “Na kërkuan firmat për Kryeprokurorin në një fletë të bardhë ku nuk shkruhej asgjë. Nuk e dimë se për cilin kandidat kemi firmosur”, pohojnë katër deputetë të PS.
Votimi për zgjedhjen e Kryeprokurorit të ri është parashikuar të kryhet seancën e ditës së hënë. Komisioni i ligjeve dorëzoi një ditë më parë raportin në Kuvend me tre kandidatura potenciale të cilët plotësojnë kushtet Ferdinand Elezi, Arta Marku dhe Ermira Tafani, ndërsa nuk kaluan “testin” Besnik Muçi, Artur Selmani, Arqile Koça dhe Granit Shahu. Orët në vazhdim mbetet për t’u parë nëse do vijojë procedura e nisur apo do kemi zhvillime surprizuese, pasi nga ana tjetër opozita ka paralajmëruar për nisjen e protestave nga dita e hënë përpara Parlamentit.
