Kryetarja e Kuvendit Lindita Nikolla ka nxjerrë urdhrin për mbledhjen e seancës së posaçme më 3 maj. Në atë ditë presidenti i Ukrainës, Volodymyr Zelenskyy do të japë një mesazh për Shqipërinë, me anë të platformës ZOOM.
Sipas shkresës zyrtare, seanca do të nisë në orën 11:00 me fjalën e presidentit ukrainas. Zelensky ka mbajtur fjalën e tij në disa parlamente të vendeve evropiane që kanë shprehur mbështetjen për Ukrainën ndaj agresionit rus.
Autoritetet shqiptare gjithashtu kanë përkrahur rezolutën e Asamblesë së Përgjithshme të OKB-së që dënon sulmin rus në Ukrainë dhe së fundi kanë nisur iniciativë për dokumentimin dhe hetimin e krimeve të luftës përmes OKB-së në këtë konflikt.
