Pas vendimit të gjykatës për njohjen e statutit të Berishës, Komisioni i Rithemelimit ka marrë drejtimin e plotë të PD. Deputeti demokrat Belind Këlliçi paralajmëroi sot se po diskutohet që të gjithë deputetët e PD të ulen në një tryezë të përbashkët për t’i dhënë fund debatit të brendshëm në selinë blu.
Gjithashtu Këlliçi theksoi se deputet e PD-së që kanë marrë votën duhet të bashkohen sa më parë për të luftuar atë që ai e quajti “pushteti i korruptuar i Edi Ramës”.
“Do të ketë një tentativë për tu ulur të gjithë deputetët. Kam parë thirrje të Ina Zhupës për tu ulur të gjithë, ajo çka duhet të ndodhë është që një orë e më parë, deputetët e PD duhet të ulen me njëri-tjetrin për të folur për të ecur përpara. Tani kemi vetëm një qëllim, përballja dhe rrëzimi i kësaj qeverie, këtë nuk e bëjmë dot vetëm”, tha deputeti i PD.
Kjo deklaratë u tha nga deputeti teksa po komentonte arrestimet e SPAK për inceneratorët, ku janë lëshuar nëntë urdhër arreste dhe pritet arrestimi i deputetit socialist Alqi Bllako.
