Kryetari i Partisë Demokratike, Lulzim Basha ka larguar ditën e sotme kreun e grupit parlament të PD, Alfred Rushajn nga ky post, për ta zëvendësuar atë me deputetin Enkelejd Alibeaj. Vendimi u bë i njohur në mbledhjen e Këshillit Kombëtar, të thirrur nga vetë kreu i PD-së.
Burime për mediat, thonë se shkak është bërë heshtja gjatë debatit me ish-kryeministrin Sali Berisha, lidhur me zhvillimet në parti pas shpalljes non grata të tij. Po ashtu një tjetër arsye për këtë lëvizje ka qenë mos mbajtja e një qëndrimi pas protestës së dhunshme të 8 janarit, thirrur nga ish kryeministri Berisha.
“Fillimisht dua t’iu informoj se me një vendim të përbashkët timin dhe të Kryetarit të Grupit Parlamentar z. Alfred Rushaj, kemi vendosur me dakordësi, që drejtimi i Grupit, me sfidat e reja që kemi përpara, t’i kalojë z. Enkelejd Alibeaj. Edhe pse z. Rushaj nuk është sot prezent në mbledhje për arsye shëndetësore, unë dua ta falenderoj atë për gjithë punën e jashtëzakonshme që ka bërë gjatë kësaj periudhe, dhe bashkërisht jemi duke punuar për një projekt të përbashkët politik për të ardhmen, që ndihmon dhe con përpara sfidat që ka PD” – u shpreh Basha në mbledhjen e Këshillit Kombëtar.
