Më në fund kanë marrë fund hetimet për vrasjen në mënyrë makabre të 71-vjeçarit shqiptar, Shefki Kurtit, i cili u gjet i copëtuar në fund të muajit korrik në ujërat e kanalit Adigetto në Polesine.
Mediat italiane shkruajnë se Prokuroria e Rovigos ka lëshuar urdhër-arrest për bashkëshorten e viktimës, Nadire Kurti. Ajo ndodhet në spitalin psikiatrik të Rovigos dhe mësohet se ka pranuar krimin.
“Po, e vrava. E bëra copë me sëpatë në banjë,”- tha ajo.
E akuzuara ishte shtruar në spital më 12 gusht për çrregullim të personalitetit deluzional. Gjithçka nisi mëngjesin e 28 korrikut, kur, pranë kanalit Adigetto në Villanova del Ghebbo, disa punonjës që po pastronin kanalin gjetën një këmbë njeriu.
Në të njëjtën ditë, në një tjetër zonë shumë pranë vendit ku u gjet këmba, u zbuluan edhe dy thasë. Brenda tyre ishin koka dhe busti i një burri. Më pas u gjetën edhe dy krahë në dy çanta të tjera. Tri ditë më vonë, më 31 korrik, u gjet edhe këmba tjetër. Fëmijët trreguan për një konflikt mes prindërve, por nuk lanë të kuptohej se nëna e tyre mund të kishte ndërmarrë një krim të rëndë.
Pensionisti 72-vjeçar me origjinë nga Durrësi, prej vitesh banonte në Badia Polesine. Ai aty kishte krijuar familjen pas martesës me Nadiren me të cilën kishte tre fëmijë, dy djem dhe një vajzë.
