Është zbardhur ngjarja e një dite më parë ku mbeti i vrarë me armë zjarri shtetasi L. A.
Policia e Shkodrës ka arrestuar të dyshuarin kryesor për vrasjen e 55-vjeçarit, Lazër Arraj (Petrushaj) në fshatin Shosh të Dukagjinit.
Sipas të dhënave në rrugë jozyrtare, i arrestuar për vrasjen e Lazer Arraj është kushëriri i tij, Marash Arraj, djali i xhaxhait. Mësohet se në momentin që është arrestuar, ai ka qënë në të njëjtën zonë duke zgjedhur që të mos largohet nga vendngjarja.
Kjo ngjarje dyshohet të ketë ndodhur për konflikte të mëparshme mes familjeve.
Viktima jetonte në Shkodër, dhe po transportonte zahiretë e dimrit nga Shoshi në momentin kur është vrarë. Sakaq, të parët që kanë pikasur trupin e pajetë të 55-vjeçarit kanë qenë nipërit e tij, të cilët më pas kanë kërkuar ndihmë duke njoftuar policinë.
Materialet iu referuan Prokurorisë së Rrethit Gjyqësor Shkodër, për veprat penale “Vrasja me paramendim” dhe “Armëmbajtja pa leje”.
