Presidenti Meta ka pritur ditën e sotme në një takim delegacionin e nivelit të lartë të Kongresit të Autoriteteve Lokale dhe Rajonale të Këshillit të Europës dhe përmes një reagimi për mediat bëhet me dije edhe temat të cilat janë diskutuar.
Mësohet se delegacioni i nivelit të lartë të Kongresit të Autoriteteve Lokale dhe Rajonale të Këshillit të Europës, po zhvillon një mision fakt-mbledhës në Shqipëri.
Presidenti Meta falenderoi për zhvillimin e këtij misioni, dhe vlerësoi veçanërisht faktin që Shqipëria vizitohet nga niveli më i lartë i përfaqësimit të Kongresit me Presidentin Anders Knape, me Presidentët e dy Dhomave, të Autoriteteve Lokale, Xavier Cadoret, dhe të Rajoneve Gunn Marit Helgesen, si dhe me Sekretarin e Përgjithshëm Andreas Kiefer.
Presidenti Meta theksoi gjithashtu se Shqipëria ndodhet në një krizë sui generis përfaqësimi, dhe në çeikulibër të plotë të mekanzimave të kontrollit dhe balancës.
“Votimet njëpartiake të 30 qershorit nuk i dhanë zgjidhje krizës, por cënuan rëndë edhe demokracinë vendore, duke e zhytur më shumë vendin në rrugën e paligjshmërisë dhe kapjes së shtetit”, – vuri në dukje Meta.
Kushtet e Bundestagut, sipas Metës, janë pasqyra më e qartë e problemeve serioze me të cilat përballet vendi, por edhe harta më e sigurtë për rrugën europiane që duhet të ndjekë pa vonesë Shqipëria.
Presidenti theksoi se është jetike për të ardhmen e qytetarëve shqiptarë që kësaj situate t’i jepet një zgjidhje tërësore, duke i kthyer legjitimitetin e munguar institucioneve përmes votës së lirë të qytetarëve.
