Shfaqa e simboleve komuniste në festivalin Sunny Hill, i organizuar nga Bashkia e Veliajt ka sjell një seri reagimesh nga deputetët e Partisë Demokratike.
Deputetja e PD-së, Dhurata Çupi Tyli shkruan se 30 vjet pas heqjes së yllit komunist nga flamuri shtetëror i Republikës së Shqipërisë është rishfaqur gjigant atje ku nuk pritej, në festivalin i cili duhet te promovonte kudo simbolet kombëtare të shqiptarëve.
“Një nga vendimet e para të Kuvendit të dalë nga zgjedhjet e 22 Marsit 1992 ishte heqja e yllit komunist nga flamuri shtetëror i Republikës së Shqipërisë. 30 vjet më pas, ylli është rishfaqur gjigant atje ku nuk pritej, në festivalin e organizuar ne Tiranë, i cili duhet te promovonte kudo simbolet kombëtare të shqiptarëve. Ndoshta mijëra të rinjtë që ishin atje për t’u argëtuar nuk e kanë vënë re detajin dhe ndoshta s’u bën as përshtypje, por organizatorët e festivalit na detyrohen një shpjegim dhe një ndjesë. Shqipëria ka shumë nevojë të promovohet si një vend normal, ku performojnë artistë të mirënjohur, rinia ka shumë nevojë të ketë mundësi për argëtim, shoqëria e ka të domosdoshme të emancipohet. Por as Shqipëria, as rinia, as shoqëria nuk mund të ecin përpara me simbolet e së keqes”, është shprehur Çupi.
Të njëjtin mednim ndan dhe deputetja Greta Bardeli Gjoni e cila përmes një komunikimi publik ka denoncuar shfaqen e simboleve komuniste në festival.
“Ata që paturpësisht shfaqin simbolet e diktaturës, si flamuri me yll i viteve të komunizmit gjakatar, janë po ata që ditën mbarëeuropiane në kujtim të viktimave të regjimeve totalitare dhe autoritare, 23 gusht, nuk bënë asnjë reagim zyrtar qoftë për kortezi në rrjetet e tyre që i perdorin ditë e natë për një realitet që ekziston vec për ta e për oligarkinë e pushtetit, ndërsa njerëzit e këtij vendi vuajnë nga kriza ekonomike e varfëria që thellohet përdite, të rinjtë, familjare me femijë që po bëhen lajm ndërkombëtar për skenat e ikjes brigjeve të europës e botës! ! Turp për ta e mallkuar qofshin simbolet e diktaturës që i mbajnë gjallë pinjollët e vegjël e të mëdhenj të komunizmit gjakatar!“ është shprehur deputetja.
