Ministri i Brendshëm ka deklaruar se Policia e Shtetit dhe organet ligjzbatuese kanë bërë skanimin e të gjitha grupeve kriminale në vend.
Në një takim për sigurinë publike, në Durrës, Fatmir Xhafaj tha se tani është gati ndërhyrja për të bërë të mundur shkatërrimin e këtyre grupeve.
“Është bërë skanimi i të gjitha grupeve kriminale, anëtarëve dhe drejtuesve të tyre, si dhe pasurisë që posedojnë këto grupe kriminale e krijuar nga aktiviteti kriminal. Do t’i vëmë këto para përgjegjësisë, një pjesë janë në proces hetimi, ndërsa janë arrestuar shumë persona si pjesë e këtyre grupeve. Ne do t’i godasim ato jo nga pikëpamja fizike, por nga pikëpamja e ligjit. Krahas ndëshkimit, jemi të fokusuar edhe te hetimi dhe goditja e aseteve kriminale të tyre sepse jo vetëm që ata do të bëjnë burg, por edhe pasuria e tyre nuk do të jetë më pronë e tyre, por do të kthehet në shërbim të qytetarëve”, tha Xhafaj.
Kreu i ministrisë së Brendshme, me shqetësim shprehu rezerva edhe për disa grupe kriminale që operojnë në Durrës.
“Nuk e pranoj faktin që 2 apo 3 grupe kriminale, që kanë aktivitet të gjatë në vite, për 10-15 vjet këtu në Durrës, dhe janë me rrezikshmëri të lartë shoqërore, nuk janë karakteristika dalluese e këtij komuniteti”, tha ministri.
