Regjisori i njohur shqiptar, Bekim Lumi ka ndërruar jetë mëngjesin e sotëm. Lajmin e hidhur e ka dhënë kolegu dramaturgu Jeton Neziraj, përmes postimi në facebook. Regjisori vuante prej dy vitesh nga sëmundja e rëndë e kancerit.
Bekim Lumi, përveçse regjizor, ishte edhe pedagog në Universitetin e Arteve në Prishtinë. Lumi numëron dhjetëra shfaqje të realizuara të suksesshme. Në 20-vjetorin e krijimtarisë së tij artistike, regjisori Lumi, në qershor të këtij viti dha premierën e shfaqjes së tij të fundit “Arturo Ui”, e cila erdhi në përvjetorin e 120-të të lindjes së autorit të saj, Bertolt Brecht.
Në fund të shfaqjes i ndjeri Lumi falënderoi të gjithë ata që e ndihmuan për shërimin e tij. Prej disa muajsh, Bekimi ishte shtruar në një spital privat në Prishtinë për shkak të gjendjes së rënduar, ku dhe ka ndërruar jetë.
