Gjykata e Fierit ka vendosur masën e sigurisë “arrest me burg” për 56- vjeçarin Petrit Mamaj, i cili mëngjesin e djeshëm vrau me thikë gruan e tij.
Ai është shoqëruar sot nga uniformat blu në gjykatë nën masa të shtuara sigurie. Avokati i Mamamj ka thënë se klienti i tij ishte “i paekuilibruar”. Megjithatë grupet hetimore zbuluan gjithë skenën që 56- vjeçari kishte planifikuar për të fshehur krimin si vetëvrasje.
Por ka qenë ekspertiza mjeko ligjore që ka zbuluar se kishim të bënim me një vrasje dhe më pas ai ka pranuar dhe treguar motivin.
Si ndodhi ngjarja
Ngjarja e rëndë ndodhi mëngjesin e djeshëm në fshatin “Sheq i Madh” në Fier, ku fillimisht u raportua se viktima kishte vrarë veten dhe ishte kunati i saj që njoftoi policinë, por hetimi ka treguar të kundërtën. Pas krimit, bashkëshorti i viktimës ka shkuar në lokal dhe ka ngrënë bukë, që ta shikonin të tjerët.
Kur është kthyer në banesë, ai ka thënë se e ka gjetur gruan të vrarë, duke njoftuar vëllanë e tij, i cili ka njoftuar edhe policinë. Por, kur autori i krimit është pyetur nga policia për rrethanat, është bërë nervoz, duke ngjallur dyshime te policia, që nga ana e saj, ka zbuluar të vërtetën.
Policia e ka gjetur 50-vjecaren të pa jetë afër krevatit, ndërsa krimi ka ndodhur në orën 06:30 të mëngjesit. Mësohet se çifti prej kohësh ka pasur probleme, ndërsa theksojmë se krimi ka ndodhur për motive xhelozie. Policia ka sekuestruar në cilësinë e provës materiale mjeti prerës(thikë), me të cilën dyshohet se autori ka kryer vrasjen.
