Policia italiane ka zbardhur sot detaje të reja nga ngjarja makabër në Itali, ku burri vrau me çekiç gruan, vajzën dhe plagosi djalin. Sipas të dhënave të publikuara në mediat italiane, ngjarja dyshohet se është kryer për shkak të konflikteve, dhe se bashkëshortja i kishte kërkuar divorcin. Alessandro Maja, 57, dyshohet se vrau gruan e tij Stefania Pivetta, 56 vjeç dhe vajzën Giulia, 16 vjeç, me goditje çekiçi, pasi dyshohet që kishte kaluar në një gjendje të rënduar psikologjike pas divorcit.
Ndërkaq, bëhet me dije se dy fëmijët janë sulmuar teksa ishin në shtrat, në dhomën e tyre, ndërsa nëna ishte në divan. Fqinjët që kanë dëgjuar britmat kanë dhënë alarmin. Ata tregojnë se, Alessandro Maja tentoi të vetëvritej pasi kishte sulmuar me çekan familjarët teksa flinin. Kur mbërritën ekipet e shpëtimit, ai ishte ende i njollosur me gjak. Mësohet së kur fqinjët kanë shkuar në vendngjarje ai ka ulëritur i tensionuar dhe ka thënë “Të gjithë i vrava, I vrava të gjithë”. Sipas dëshmisë së tyre, burri i gjakosur ka thënë se çfarë ka bërë sapo dy femrat janë afruar.
Një fqinj tjetër tha se kishte dëgjuar kërkesat për ndihmë nga djali i saj Nicolò, 23 vjeç, i cili gjithashtu u qëllua në gjumë. “Fatkeqësisht është plagosur rëndë”, tha me zë të thyer bashkëshorti i kushërirës së Stefanias kur mbërriti në shtëpinë ku ndodhën vrasjet. Në vend u gjet një çekiç dhe një shpuese me gjak në të.
