Gjykata e Apelit të Krimeve të Rënda ka lënë në fuqi dënimin me “burg për jetë” që dha Shkalla e Parë për Denis Shtrazën. Denis Shtraza është i akuzuar për vrasjen e Gazmend Çollakut, i cili u rrëmbye në vitin 2016 dhe u ekzekutua. Shkalla e Parë e dënoi me ‘burg për jetë’ në 19 mars Denis Shtrazën, ai e apeloi vendimin, ndërsa edhe kjo gjykatë vendosi sot që të konfirmonte këtë dënim.
Gazmend Çollaku, u rrëmbye nga katër persona në parkingun e një lokali pranë Portit të Durrësit në janar 2016. Ai u gjet të nesërmen i pajetë me një plagë plumbi në kokë dhe gjymtyrë të lidhura, i hedhur në anë të një rruge në zonën e Fushë-Krujës. Për të njëjtën ngjarje u akuzua edhe ish-oficeri i policisë së Tiranës, Ervin Dalipaj, i cili u ekzekutua në një atentat mafioz në prill 2017 pranë Sukthit, ndërkohë që ishte në kërkim nga drejtësia.
Argumentimi i gjykatës së Shkallës së Parë në 19 mars
Në argumentimin e vendimit penal, relatori i trupit gjykues argumentoi se se njollat e gjakut të konstatuara në mjetin “Mercedes Benz ML”, në të cilin kanë udhëtuar Ervin Dalipaj dhe Denis Shtraza 3-4 orë pas ngjarjes, janë të viktimës Çollaku. Mirëpo ekspertizat e ADN-së në disa seanca gjyqësore të mëparshme, rezultuan të pavlefshme pasi mostrat me elementë ADN-je janë ngatërruar. Dy ekspertët Amarda Deda dhe Aleksandër Bushati, që analizuan njollat e gjakut të gjetura në vendngjarje, në një makinë që dyshohet se u përdor për vrasjen, të personit të akuzuar dhe të viktimës, i thanë gjykatës se mostrat me gjakun e viktimës nuk ishin të sakta. “Për ne ky rast ka qënë unikal dhe për të qënë të sigurt dhe me veten tonë, i kemi kryer disa herë analizat dhe dilnin të njëjta rezultate,”-ka deklaruar ekspertia biologe Amarda Deda.
Ekspertja shpjegoi se mostrat e gjakut që shërbenin për të zbuluar ADN-në duhej të ishin ngatërruar, pasi gjaku i marrë nga trupi i viktimës në morg nuk përputhej me atë të nënës së viktimës. Për për gjykata gjatë procesit vendosi të rieskpertojë sërisht mostrat e gjakut. Më tej gjykata zgjeroi argumentin duke vlerësuar se viktima nuk kishte njohje me Dalipajn dhe se nuk kishte pasur kontakt me mjetin e tij. Por në mungesë të një kontakti të mëparshëm të viktimës me këtë automjet, arsyetoi gjykata, njollat e gjakut në mjet janë bërë ose nga një kontakt fizik direkt, ose nga mjetet me të cilat është goditur, qëlluar, lidhur apo mbështjellë Çollaku.
