Në një intervistë për mediat, ish-deputeti demokrat, Myslim Murrizi, u shpreh se komisari i policisë, Arjan Tase, pritej që të emërohej në një post më të lartë, nga funksioni që kishte para ngjarjes tragjike të ndodhur në Potam të Himarës, ku skafi që drejtonte goditi për vdekje një vajzë 7-vjeçare. Sipas Murrizit, Tase do të emërohej ditën e hënë si shefi i antidrogës në Policinë e Elbasanit.
“Kjo është një ngjarje që ka për autor një njeri me spaleta. Një ish-shef Komisariati në Himarë, ishte emëruar për pak kohë në Elbasan. Ndoshta ka qenë në delir, pasi nga informacionet që kam unë, ditën e hënë priste një emërim tjetër, ose atje, ose shefi i antidrogës në Elbasan. Prandaj ka qenë si në delir. Pra është një promovim i një elementi kontingjent në Policinë e Shtetit. Policia duhet të ketë me letra 15 mijë punonjës, por për hatër të çdo shefi, një polic që rri çdo ditë në rrugë, mban për peshë llumhanen e drejtuesve të tyre” – u shpreh Murrizi.
Sipas ish-deputetit Murrizi, në qeverinë Rama ka trafikantë strategjikë, arrogantë strategjikë, hajdutë strategjikë.
“Me 600 kuaj fuqi, të garantoj unë që nga Potami, për 1 orë del në Leçe. Për këtë përdorej ky skaf. Më erdhi mirë që qytetarët shqiptarë reaguan në protestë” – tha ish-deputeti Myslim Murrizi.
