Në Kuvend po mbahet një interpelancë urgjente me ministrin e Brendshëm, Sandër Lleshaj, kërkuar nga opozita lidhur me kriminalitetin në vend.
Duke iu referuar tekstit të dërguar nga grupi i deputetëve, ministri i Punëve të Brendshme Sandër Lleshaj u shpreh, se në tekst është përdorur shpesh fjala “galopante”, si për shembull “Shipëria ka një rritje galopante të krimit”. Sipas Lleshajt, në fakt në Shqipëri ka ulje galopante të krimit.
“Në fakt, po përdor këtë terminologjinë tuaj, keni bërë supozime dhe hamendësime galopante në drejtim të pavërtetës. Ndonëse e vlerësoj përherë, nevojën për të diskutuar për nivelin e kriminalitetit në vend, po aq i refuzoj teprimet ekstreme të situatës…Do thoja që teprimet janë të dëmshme, për arsye se paraqesin një situatë e cila nuk ekziston.. Shtrembërimi i situatës është i dëmshëm për këdo që e do këtë vend. Mos ta vizatojmë më të zi nga është realiteti. T’i afrohemi të vërtetës. Pretendoni që ka rritje galopante të kriminalitetit, jo të nderuar, në Shqipëri ka një ulje galopante të kriminalitetit. Nuk ka rritje, por ulje, për këdo që di shkrim dhe këndim. Dhe kushdo që di shkrim dhe këndim duhet t’u referohet shifrave zyrtare. Pra kemi tendencë të dukshme në ulje në krahasim me një vit më pare..Konkluzioni juaj për rritje galopante të krimit, është në mënyrë galopante shtrembërim i realitetit. Ku i keni referencat?” përfundoi Lleshaj.
