Të tjera detaje dalin në dritë nga vrasja e të riut gjatë natës në Laprakë, pasi nuk iu përgjigj urdhrit të policisë për të ndaluar. Ngjarja ndodhi rreth orës 01:45 në rrugën “Dritan Hoxha”, ndërsa viktimë mbeti Klodjan Raxha.
Raportohet se i riu deri në orën 23:00 kishte qenë në një lokal në zonën e “Don Boskos” dhe më pas teksa kthehej për në banesë i është bërë shenjë nga patrulla e policisë që të ndalonte. Pavarësisht këtij urdhri, i riu është futur mes rrugicave për të humbur gjurmët, ndërsa vetëm 100 metra larg banesës së tij është qëlluar 2 herë me plumb, duke i shkaktuar vdekjen.
Policia në deklaratën zyrtare sqaroi se polici ka vepruar në një situatë ku rruga ishte e pandriçuar, ndërsa duke u bazuar nga dëshmia e banorëve të zonës, kjo rrugicë ka ndriçim. Po ashtu, në vendin e ngjarjes duken ende njollat e gjakut të të riut, i cili ndërroi jetë në spital.
Aktualisht punonjësi i policisë që qëlloi ndaj 25-vjeçarit, shtetasi me inicialet N.H., po merret në pyetje nga kolegët e tij.
