Në Gjykatën Themeleore në Prishtinë të martën u mbajt gjyqi rreth vrasjes së politikanit serb, tashmë politikan nderi postmortem, Oliver Ivanoviç. Trupi gjykues mori aktvendim që përmes një lidhjeje video të dëgjojë deklaratën e dëshmitares Milena Popoviç, ish-partnerja e Oliver Ivanoviçit.
Kryetari i trupit gjykues, gjykatësi Valon Kurtaj, njoftoi palët se dëshmitarja Popoviç është ftuar në mënyrë të rregullt nga gjykata përmes e-mailit për të dhënë dëshminë e saj, Por ajo përmes e-maili ka njoftuar gjykatën se nuk mund të jetë e pranishme në seancë për shkaqe të situatës politike dhe sigurisë së saj.
Ish-partnerja e Oliver Ivanoviçit tha se është e gatshme të flasë por vetëm përmes video-linkut.
E prokurori special Burim Çerkini, deklaroi se për shkak të mungesës së saj shqyrtimi gjyqësor është shtyrë disa herë, por deklaroi se nuk mund ta presin deri në pafundësi këtë dëshmitare.
“Ne kemi një dëshmi të cilën e ka dhënë dhe nëse eventualisht nuk kemi ndonjë e-mail zyrtar që nesër do të jetë prezent, ndoshta sot e njofton gjykatën që nesër do të jetë prezent, atëherë sikurse tek dëshmitarët tjerë ne pajtohemi që seanca të vazhdojë edhe pa dëgjimin e saj, tu e konsideruar të lexuar dhe të vazhdojmë me planet tjera që i kemi në këtë çështje penale”, tha prokurori Çerkini.
Në anën tjetër, mbrojtësi i të akuzuarit Nedelkjo Spasojeviç, avokati Faruk Korenica, lidhur me dëshmitaren Popoviç ka thënë se disa herë përmes televizionit e ka dëgjuar atë duke thënë se është e gatshme të paraqitet para gjykatës dhe të tregojë se kush është porositësi i vrasjes, motivi i vrasjes dhe sipas tij herën e fundit atë e ka dëgjuar duke thënë edhe emrin e personit që e ka ekzekutuar Ivanoviçin.
“Ajo ka dhënë në fillim disa deklarata dhe është e sigurt që Oliver Ivanoviçin e kanë vrarë shqiptarët, prandaj edhe e arsyeton ikjen menjëherë pas vrasjes në Beograd, ndërsa sot flet diçka tjetër”, tha avokati Korenica.
Nacionale
