Kancelarja gjermane Angela Merkel do të takojë presidentin e Rusisë, Vladimir Putin më dat 11 janar. Lajmi u bë i ditur nga Kremlini zyrtar, ndërsa mësohet se ka qenë Putin ai që ka ftuar kancelaren.
Shërbimi për media i Putinit tha se ky i fundit dhe Merkel do të diskutojnë për krizën në Lindjen e Mesme, e cila është thelluar pas vrasjes së gjeneralit iranian Qasem Soleimani nga ushtria amerikane. Ky sulm solli edhe përplasjet dhe tensionet mes SHBA-ve dhe Iranit.
Kremlini tha se dy liderët do të bisedojnë edhe për situatën në Siri, Libi dhe Ukrainë. Zyra e Merkelit po ashtu konfirmoi se kancelarja gjermane planifikon të vizitojë Rusinë më 11 janar dhe të takojë Putinin.
Ndërkohë, zëdhënësi i Merkelit, Steffen Seibert, tha se Merkel do të diskutojë; “çështjet aktuale ndërkombëtare” me Putinin. Ato përfshijnë: Sirinë, Libinë, Iranin, Irakun dhe Ukrainën. Seibert shtoi se Rusia “është një anëtare e rëndësishme në skenën botërore” dhe se “është e pashmangshme kur bëhet fjalë për zgjidhjen e konflikteve në botë”. Ministri i Jashtëm gjerman, Heiko Maas, do ta shoqërojë Merkelin në Moskë, tha po ashtu Seibert.
