Me këngë e valle, në rresht, hapur, pa dhomë të fshehtë, me gogla dhe jo fletëvotimi, shqiptarët votonin parinë dhe udhëheqësin e “dashur”… nuk kishte nevojë as për KQZ, as fushatë, as numërim me dorë ose elektronik.
Nga Afrim Krasniqi
Vota? Vendet me kulturë demokratike e lidhin votën me ndryshimin, zhvillimin dhe vendimarrjet e mëdha. Tek ne ndodh ndryshe, ne e lidhim votën me liderin, partinë, udhëheqësin. Të rinjtë qeshin me ne, kur u themi sesi votonim dikur, si në këtë video 1954, – me këngë e valle, në rresht, hapur, pa dhomë të fshehtë, me gogla dhe jo fletëvotimi, me 100% pjesëmarrje e 100% vota pro. Nuk kishte nevojë as për KQZ, as fushatë, as numërim me dorë ose elektronik. Dhe ky brez që është rritur e edukuar me këtë model votimi përbën sot elitën politike vendimmarrëse në Shqipëri. Shikoni si i bëjnë zgjedhjet në partitë që drejtojnë, – njësoj si kjo kronikë e vitit 1954. Pa rivalë, pa vota kundër, me këngë e valle, me dashuri për udhëheqësin dhe urrejtje për kritikët e tij.
Ata duhet ta shohin këtë video për të parë se kujt i ngjajnë, – të rinjtë e sotëm duhet ta shohin për të parë sesi “në emër të popullit” diktatura sundonte e qetë. Dhe të gjithë duhet ta shohim për të reflektuar, e për të ngritur zërin, për të refuzuar zgjedhje të tilla në partitë politike, për të refuzuar mentalitete të tilla në zgjedhjet lokale e parlamentare, për të refuzuar ligjërimin e atyre që flasin në emër të popullit dhe mund të kthehen fatkeqësia e tij, për të refuzuar alternativat e turmave militante të majta e të djathta të gatshme të përsërisin të njëjtën pamje edhe në rrethanat e sotme, dhe për të kuptuar se ky vend e kjo shoqëri e ka nevojë jetike ndarjen me praktikat e gabuara të së kaluarës, krijimin e institucioneve të forta dhe jo liderëve të fortë, nxitjen dhe jetësimin në praktikë të normave demokratike, – të një demokracie funksionale në jetë, në shoqëri, në shtet, në parti, në familje, në shkollë, në kolektiv dhe kudo tjetër.
Kjo po, do të ishte revolucion, rilindje, republikë e re e gjithçka tjetër. Pa to, nuk jemi asgjëkund dhe nuk po shkojmë asgjëkund, harxhojmë kohë e fjalë, dhe në thelb, thjesht po ri-përsërisim me rotacion arrogancën, absurdin, provincializmin dhe etjen pakufi për pushtet të sundimtarëve të radhës.
https://www.facebook.com/afrim.krasniqi.50/videos/10212380912935837/
