Sandër Vallaj jeton dhe punon që nga viti 1994 në Itali, por ai është kthyer këtë vit në fshatin e tij në Brataj të Vlorës me një projekt të bukur në mendje. Ai ka realizuar një shqiponjë në formën e dy duarve në gur në një shkëmb në fshatin e tij duke krijuar një skulpturë vërtetë të bukur. “Në Brataj vetëm gurët nuk na mungojnë. Këtë gjë mendova teksa ndiqja ndeshjet e Kombëtares dhe emocionohesha pas tyre. Menjëherë sapo e ndava idenë me disa nga bashkfshatarët e mi në Pistoja të Italisë, gjeta mbështetjen e tyre dhe tani kjo punë është duke përfunduar”,- tha ai sot i ftuar në programin e mëngjesit “Ëake Up” në “Top Channnel”.
Ai tha më tej se e ka realizuar pikërisht në muajin shkurt si dhuratë për shqiptarët e Kosovës. “Donim që ta përfundonim para 17 shkurtit, që përkon me Ditën e Pavarësisë së Kosovës, si një dhuratë edhe për ta”. Gjithë projekti kap vlerën e 5700 eurove, nga të cilat 3000 euro Sandri i ka vënë nga xhepat e tij.
Përmasat e duarve në formë shqiponje janë 36 centimetra. Sandri si ideator, por edhe të tjerët që iu bashkuan idesë së tij, shpresojnë që një ditë, kjo nismë të kthehet në një destinacion nga gjithë shqiptarët që shkojnë drejt Vlorës për pushime.
