Tifozët e Flamurtarit dhe Partizanit nderojnë tifozin që humbi jetën të mërkurën në stadium, ndërkohë që vazhdojnë hetimet për shkakun e vdekjes
Flamurtari kthehet të luajë sërish në stadiumin e tij, një ndeshje po aq të rëndësishme sa në mesjavë. Tashmë kundër Partizanit për kampionat, për t’i shpëtuar përpëlitjes në zonën e ftohtë, ndërkohë që të mërkurën pothuajse u eleminua nga Kupa e Shqipërisë prej Kukësit. Por në ndeshjen e së djelës dominoi dhimbja dhe jo për hir të rezultateve të skuadrës. Vetëm katër ditë më parë, pikërisht në stadiumin “Flamurtari”, u nda nga jeta një tifoz, fare i ri në moshë, i cili la jetimë dy fëmijët e tij. U gjend në fund të shkallëve pa jetë, ndërsa versionet e të tjerëve që ishin prezentë në po ato shkallë ishin të ndryshme. U tha fillimisht që është shtyrë nga një polic dhe kjo mbetet një hipotezë, ndërkohë që bëhet e ditur se kanë filluar hetimet. Sidoqoftë, ende nuk ka një version zyrtar për shkaqet e vdekjes së tifozit të mbërritur në stadium nga Orikumi ku banonte, me qëllimin për të ndjekur nga afër skuadrën e tij.
Dje administrator i klubit, Sinan Idrizi, i cili i ka lidhur edhe një pension fëmijëve të të ndjerit, u ka kërkuar drejtuesve të rendit që prania e uniformave blu të ishte më e pakët për këtë ndeshje, ndërkohë që futbollistët dhe tifozët e të dy skuadrave kanë nderuar Mikel Selmanajn, i cili tashmë në stadium kishte vetëm një portret të tijin. Në fillim të takimit, kapitenët Telushi dhe Hoxha, sëbashku me arbitrin Kridens Meta kanë vendosur lule pikërisht ku ishte portreti, por edhe tifozët e Partizanit një shall me simbolet e “Ultras Guerils”, si dhe kanë thirrur në korr emrin e Mikelit. Hështja për njerëzit e shkallëve ka zgjatur pesë minuta dhe vetëm më pas kanë filluar të mbështesin ekipet e tyre. Administratori Idrizi citohet të ketë thënë që në atë sektor ku Mikeli ndërroi jetë nuk ka kamera survejuese, por të mos zbardhet shkaku në një stadium, kun ë vend të kamerave janë qindra palë sy, kjo mund të ndodhë vetëm në Shqipëri, ku jeta e njeriut nuk është shumë e rëndësishme.
