Pas premtimit se shëtitorja e Vlorës do të mbaronte më 30 prill, ambasadorja e BE-së në Tiranë, Romana Vlahutin ka shkuar këtë të shtunë për të inspektuar punimet për Lungomaren. Ky inspektim vjen për shkak se pjesa dërrmuese e projekteve në infrastrukturën e qytetit të Vlorës financohet me fondet e Bashkimit Europian.
“Isha këtu në fund të janarit dhe atëherë më dhanë të gjitha garancitë e mundshme se gjithçka do të mbaronte më 30 prill. Dhe për ne kjo vazhdon të mbetet data kur duhet të përfundojnë të gjitha detyrimet kontraktuale që ekzistojnë. Unë dua të mbetem optimiste, por do të mbetem optimiste me kujdes të madh sepse të gjithë ata që jetojnë në Vlorë dhe ata që e vizitojnë Vlorën e shohin se sa shumë punë ka ende për t’u bërë. Kemi rënë dakord me kompaninë që të na japë një raport ditor për punimet, për të parë në ç’pikë ka vajtur puna. Është koha që ky projekt të përfundojë”- deklaroi Vlahutin.
