Përhapja e virusit Zika, sikurse të gjithë viruset e tjera të transmetuara nga mushkonjat, janë të përshpejtuara nga ndryshimet klimaterike. Kjo referohet nga ekspertë të ndryshëm, të cilët do të mbajnë një konferencë më 25 prill në Paris, mbi sëmundjet infektive dhe vektorët që ndihmojnë në përhapjen e tyre. Me shtimin e temperaturave, Moritz Kraemer, studiuese në Universitetin e Oksfordit, nënvizon se mushkonja Aedes, përgjegjëse për përhapjen e virusit Zika, si dhe viruseve të tjera siç është Chikungunja, po përhapen në shumë vende. Përveç këtij efekti, edhe biologjia e këtyre mushkonjave ndikohet nga i ngrohti.
Me rritjen e temperaturave, koha që i duhet një virusi të ngjitet nga stomaku i mushkonjës deri në pështymë është më e shkurtër, çka shton rrezikun e infektimit të njerëzve para se insekti të ngordhë. Temperaturat e larta shkurtojnë periudhën e maturimit të vezëve dhe të përsëritjes së virusit. Në temperaturën 28 gradë, vezëve u duhen 8-10 ditë që të hapen, ndërsa në temperaturë 25 gradë u duhen 2 javë. Sa i takon përhapjes, në kontinentin amerikan rezulton se vetëm Kanadaja është imune ndaj mushkonjës së akuzuar për përhapjen e virusit Zika. Rreziku, nënvizojnë studiuesit, qëndron se me shtimin e temperaturave, viruse të tilla do të shtojnë rastet e infektimit edhe në Europë, pas konstatimit të disa të rasteve.
