Ish-eurodeputetja e Parlamentit Europian, Doris Pack ka reaguar në lidhje me një lajm që qarkulloi në media disa ditë më parë lidhur me vilën e blerë së fundmi nga ambasadorja e BE-së Romana Vlahutin.
Në një deklaratë për median, Doris Pack u shpreh se do të ndihej e turpëruar nëse lajmi për vilën e ambasadores Vlahutin do të ishte i vërtetë, dhe se ky do të ishte turp për Bashkimin Europian.
“Për të qënë e sinqertë, do ndihesha me të vërtetë e turpëruar, nëse ato që thuhen për ambasadoren e BE-së në Tiranë do ishte e vërtetë. Nuk e di, por ajo që kam dëgjuar më ka inatosur shumë. Nëse është e vërtetë, është një turp i madh për Bashkimin Europian, sepse ne ju kërkojmë juve të luftoni korrupsionin dhe krimin dhe nëse dikush prej nesh është me të vërtetë i përfshirë në diçka të tillë, atëherë për ne është një turp i madh”, tha Pack.
