Gunnlaugsso akuzohet se fshehu miliona dollarë pasuri
Kryeministri i Islandës, Sigmundur Gunnlaugsso dha dorëheqjen pas shpërthimit të skandalit “Panama Papers” ku ai akuzohej se kishte fshehur miliona. Ai përbën “viktimën” e parë të skandalit me përmasa botërore të shpërthyer dy ditë më parë. Mediat islandeze kanë transmetuar fjalën e zëvendëskryetarit të Partisë Progresive, Sigurdur Johannsson, i cili ka thënë se do ta zëvendësojë kryeminsitrin në këtë post. Ai ka sqaruar se “Kryeministri i ka thënë grupit parlamentar të partisë së tij se ai do të tërheqet nga pozita e kryeminsitrit”.
Më herët Kryeministri i Islandës Sigmundur Gunnlaugsson i kërkoi Presidentit të vendit Olafur Grimsson që të shpërndajë Parlamentin. Dokumentet e publikuara nga firma Mossack Fonseca në Panama, dëshmonin se kryeministri Sigmundur Gunnlaugsson kishte në pronësi një kompaninë jashtë vendit , së bashku me gruan e tij. Ai u akuzua për fshehjen e aseteve familjare me vlerë prej miliona dollarësh. Një protestë e madhe është mbajtur përpara parlamentit në Islandë të hënën, ku protestuesit kërkuan dorëheqjen e tij.
