Këshilli i Lartë Gjyqësor ka vendosur sot për pezullimin e gjyqtares të Elbasanit Enkeleda Kapedani. Kujtojmë se KLGJ e nisi procedimin disiplinor ndaj gjyqtares pas publikimit të disa videove të sajat në platformën TikTok.
Në seancën e sotme dëgjimore, Kapedani kërkoi ndjesë por theksoi se po gjykohet për shkak të veshjes dhe shijes muzikore.
“Shpresoj që zëri im të dëgjohet, do e nis me një ndjesë publike. Po gjykohem për veshjen, pamjen apo shijen muzikore,” u shpreh gjyqtarja.
Gjyqtarja ka thënë më tej se videot që u publikuan në TikTok i ka bërë nga stresi. Kapedani ka pranuar publikimin e videove, duke e cilësuar si mëkatin e vetëm të saj.
“Kam bërë video për shkak të lodhjes dhe stresit. Por nuk kam pasur si qëllim t’i publikoj. Gjithë kjo që ka ndodhur është tmerr personal, moral, për mua prindërit dhe bashkëjetuesin. Të gjithë po më bëjnë gjyq popull mediatik dhe moral. Pres nga ju një vendim të pa anshëm. Të vetmin mëkat që kam bërë është publikimi i videove,” ka shtuar ajo.
E prekur, Kapedani u justifikua se të gjithë gjyqtarët sipas saj bëjnë video. “Pse po gjykohem kaq ashpër për një veprim. Të gjithë gjyqtarët publikojnë video, pse jam e goditur unë, kush ka interes, punën e kujt po pengoj?”.
Pas publikimit të videove, Inspektori i Lartë i Drejtësisë Artur Metani i dërgoi KLGJ-së kërkesën për pezullimin e menjëhershëm dhe shkarkimin nga detyra të gjyqtares së Elbasanit.
