Ditën e djeshme skuadra e Partizanit është grumbulluar në hotelin e klubit, ndërsa në mbrëmje zhvilluan stërvitjen e fundit përpara derbit të sotëm në “Air Albania” në orën 20:00, në llogari të javës së 15-të të kampionatit.
I pari që u paraqit në stadiumin “Partizani” ishte trajneri Xhovani Kolela, që para se të niste stërvitjen duhej të jepte konferencën e zakonshme para derbit. Pak minuta pasi Kolela kishte shuar kureshtjet e gazetarëve, në impiant mbërriti autobusi i ekipit dhe lojtarët zbarkuan në dhomat e zhveshjes. Ne ishim në pozicionuar në tribunën kryesore të stadiumit dhe britmat e shakatë e lojtarëve dëgjoheshin deri aty, çka ishte një sinjal i qartë se ky derbi nuk po përgatitet me trysninë e atyre të shkuarve.
Nuk ndodh shpesh, por këtë herë i pari nga skuadra që doli në fushë ishte Xhuliano Skuka. Më pas zbarkoi pjesa tjetër dhe të gjithë po prisnin daljen e trajnerit Kolela dhe stafit të tij, që ishin të angazhuar me detajet e fundit të planit të stërvitjes finale.
ATMOSFERA
Nëse një futbollist ndodhet në fushë, nuk mund të qëndrojë duarkryq duke pritur. Murataj, Skuka, Hadroj dhe Hodo “zaptuan” tavolinën e “Teqball” dhe u argëtuan duke luajtur lojën shumë të famshme, veçanërisht në Brazil. Pjesa tjetër e skuadrës ishin vendosur në pjesën e mesit të fushës duke bërë lojëra të ndryshme apo edhe thjesht pasime.
Pjesë e lojërave u bë edhe trajneri i portierëve, Ilir Bozhiqi, që ende ruante një prekje shumë të ëmbël dhe kontroll plot klas të topit. 24 orë më pas luhet derbi, por kjo nuk i ndalon aspak të kuqtë të krijojnë edhe situata gazmore, që në fakt janë shumë efektive për të ulur tensionin e një sfide të tillë. Ndryshe nga derbet e kaluara, presidenti Demi dje nuk u pa të vizitonte skuadrën. I vetmi drejtues i klubit, prezent në stërvitje, ishte drejtori sportiv, Elton Marini. Ai i ndjek rregullisht seancat stërvitore.
ANALIZA
Trajneri Kolela gjatë gjithë javës i ka kushtuar një rëndësi shumë të madhe video-analizës, duke e studiuar deri në detajet më të vogla skuadrën bardheblu. Edhe ditën e djeshme para stërvitjes, trajneri ka bërë mbi një orë video-analizë të kundërshtarit për të qenë sa më i përgatitur për këtë sfidë, me qëllimin për të mos i lënë asgjë rastësisë.
/Panorama Sport/
