Kryetari i komisionit të ligjeve, Fatmir Xhafaj ka deklaruar se vonesat në miratimin e ligjit të vettingut mund të kenë pasoja fatale për drejtësinë.
Në bashkëbisedimin me gazetarët Xhafaj nuk dha një zgjidhje konkrete që do të ndjekë mazhoranca e majtë nëse edhe në seancën e ardhshme të posaçme për vettingun opozita nuk paraqet tre anëtarët e saj për komisionin e parë, atë të verifikimit.
“Pas këtij procesi vazhdohet me hapat që i përkasin Kuvendit, sipas Kushtetutës dhe ligjit dhe në këtë moment nuk mund të ketë kthim prapa, por procesi do vazhdojë përpara siç e parashikon Kushtetuta dhe ligji”, tha Xhafaj.
Kthimin për shqyrtim të dosjeve tek Avokati i Popullit dhe rihapjen e garës për kandidaturat për organet e vettingut, Xhafaj e cilësoi një proces administrativ.
Xhafaj nuk harroi t’i kujtojë demokratëve se kanë votuar aneksin e Kushtetutës që parashikon vettingun dhe faktin se kanë detyrime ndaj Kushtetutës së re.
