24 pyetjet për lidhjet me krimin që gjyqtarët dhe prokurorët nuk do të mund t’i shmangin. Kontroll pasurisë deri në brezin e katërt dhe krushqitë deri në brezin e dytë
Nuk duket se ka shumë rrugë shpëtimi për gjyqtarët e prokurorët e korruptuar. Do të jenë katër formularë vetdeklarimi të cilët verifikojnë çdo lloj lidhje që secili gjyqtarë ka pasur apo ka, me njerëz të dyshuar të botës së krimit. Njëri prej katër formularëve duket të jetë ai që do të kap në kurth gjyqtarët e prokurorët e korruptuar. Është Formulari i tretë, i detyrueshëm për kandidatët që do të aplikojnë për 21 vendet e organeve që do të bëjnë “Vettingu”-n e të gjithë gjyqtarëve dhe prokurorëve. Shqiptarja.com ka publikuar pjesë nga ky formular.
Përmes 24 pyetyjeve që përmban ky formular, verifikohet pastërtia e figurës së kandidatëve sa i përket lidhjeve me botën e krimit. Pyetësori është ndarë në 5 kapituj: të dhënat identifikuese, të dhënat e vendbanimit, të dhënat për arsimin dhe kualifikimin, të dhënat për punësimin dhe të dhënat për sigurinë. Pyetja e parë e këtij kapitulli është: “A jeni përfshirë në veprimtari që lidhen me krimin e organizuar? Nëse po ju lutem jepni shpjegime”-thuhet në pyetjen e parë.
Ndërsa pyetja e dytë është: “A keni pasur kontakte të papërshtatshme në formën e një telefonatë, telekomunikim, takime, aktiviteti, vakti ose raste të tjera, me një ose më shumë persona të përfshirë në krimin e organizuar, që nuk është në pajtim me ushtrimin e detyrës? Nëse po, ju lutem jepni të dhënat e identitetit të personit, lidhjen tuaj me të dhe të dhëna për veprat penale për të cilat është hetuar ose/dhe akuzuar”.
Formulari i parë përmban një pyetësor mbi aftësitë profesionale, nëpërmjet të cilit gjyqtari apo prokurori jep të dhëna për ecurinë e çështjeve që ka patur në ngarkim 3 vitet e fundit. Ndërsa formuari i dytë për deklarimin e pasurisë, që autorizon institucionet vendasve dhe vëzhguesit të verifikojnë çdo të dhënë pasurie të vetë personit dhe të familjarëve të tij, që përcaktohen me ligj.
Në këtë formular është interesante harta e gjerë e familjarëve, nga kushërinjtë deri në brez të katërt, deri tek krushqia në brez të dytë.
Pasi prokurorët dhe gjyqtarët të kenë plotësuar nga 4 formularë me pyetje rreth tyre, më pas do të bëhet verifikimi i këtyre informacioneve përmes strukturave të vetingut. Nëse në përgjigjete tyre gjenden pasaktësi atëherë ata përjashtohen nga gara.
